Çirûska ewil a “Şoreşa Rojava” ya 19’ê Tîrmeha 2012’an li Kobanê hate vêxistin. Kobanê, 10 sal berê ji dagirkeriya DAIŞ’ê hate rizgarkirin. Di encama berxwedana 134 rojan de Kobanê serkeftineke dîrokî bi dest xist. Kobanê, di 26’ê Çileya 2015’an saet 14.50’ê de hate rizgarkirin û rizgarkirina Kobanê, bû destpêka têkçûna DAIŞ’ê ku tirsa xwe li hemû cîhanê belav kiribû. 

 

DAIŞ a ku baskekê El Qaîdeyê bû û bi destê hêzên serdest hate mezinkirin, di demekî kin de Mûsil a Iraqê û Reqa ya Sûriyeyê dagir kir. Piştre jî berê xwe da Şamê. Li gorî îfadeyên DAIŞ’iyên teslîm bûn, ji nişka ve berê wan dan Kobanê ku ji siyaseta Rêya 3’yemîn tawîz nedida. DAIŞ a ku bi çekên giran ên artêşa Iraqê li pey xwe hiştibû êriş dikir, di 2’yê Cotmeha 2014’an de ji 354 gundên Kobanê 350 jê dagir kir. Di 5’ê Cotmehê de jî xwe gihand Girê Miştenûrê ku cihê herî bilind ê Kobanê ye. DAIŞ, bi saya çalakiyên fedaî yên fermandarên YPJ’ê Arîn Mîrkan û Rîvanayê hate sekinandin. 

 

Şervanekê YPG’ê serkeftina Kobanê ya piştî berxwedana 134 rojan bi van gotinan li dîrokê neqişand: “26’ê meha Çile 2015’an. Kobanê rizgar bû. Saet 3 kêm 10 deqe.”

 

Eyşe Efendî ku weke Yadê ya Kobanê tê naskirin, bi wesîleya salvegera rizgarkirina Kobanê axivî. 

 

KURD LI KOBANÊ BÛN YEK

 

Di dema êrişên dijwar ên ser Kobanê de Eyşe Efendî Hevseroka Dîwana Meclisa Gel a Rojava bû û niha jî Hevseroka Meclisa Malbatên Şehîdan a Herêma Firatê ye. Eyşe Efendî, got: “Dîroka reş a Kurdan, bi berxwedana Kobanê ronî bû.” 

 

Eyşe Efendî, bi bîr xist ku Kurdistan 100 sal berê bi Peymana Lozanê re di navbera 4 netewe dewletan de hatiye parçekirin û wiha pê de çû: “Kurdên li 4 parçeyan hatin dabeşkirin, 10 sal berê li Kobanê hatin gel hev û nîşan dan ku bûne yek. Ciwan û jinên 10 sal berê li Kobanê hatin gel hev, xwîna wan tevî xwîna hev bû. Sînorên di navbera me de hatibûn xêzkirin, 10 sal berê êdî bêwate bûn. Sînorên her çar parçeyên Kurdistanê 10 sal berê bi berxwedana Kobanê bûne yek. Yekitiya neteweyî ya Kurdan, li Kobanê pêk hat. Pêşmergeyên xwedî şeref û namûs derbasî Kobanê bûn. Gelê bakurê Kurdistanê û Rojava bû yek. Pirsûs bi Kobanê re bû yek. Dilê her çar parçeyên Kurdistanê ji bo azadiya Kobanê lê ket.”

 

‘MÎRATEYA BERXWEDANA APOYÎ’

 

Bi domdarî Eyşe Efendî anî ziman ku berxwedana Kobanê hêza xwe ji têkoşîna azadiyê ya Kurd a di sala 1978’an de hatiye destpêkirin digire û wiha dirêjî da axaftina xwe: “Mîrateyeke berxwedana Apoyî ya 50 salan heye. Ev mîrateye 10 sal bûn di dilê gel de kom dibû. Gel, ev mîrateye di sala 2014’an de da der. Gelê Kurd ev firsenda berxwedanê paşguh nekir û bi berxwedaneke bêhempa herf bi herf bi xwîna xwe nivîsand. Gelên Sûriyeyê strarta şoreşê di sala 2011’an de da. Ji nava vê şoreşê Şoreşa Rojava derket. Şoreşa Rojava jî bi xwe re şoreşa jinê anî. YPJ li Kobanê li ser navê hemû jinên cîhanê têkoşiya. Li Kobanê jinan li pêşiya her kesî li ber xwe dan û bûn pêşengên şoreşê. Lewma Şoreşa Rojava weke şoreşa jinê li dîrokê hate nivîsandin.” 

 

‘KOBANÊ BI SERBILINDÎ LI SER PÊYA YE’

 

Eyşe Efendî, got ku di demeke netewe dewlet li hemberî DAIŞ’ê yek bi yek têk diçûn de gelê Kurd û dostên wan li ber xwe dane û ev tişt anî ziman: “Ji sedî 80’ê Kobanê hilweşiya. Hate dagirkirin. Emîrê DAIŞ’ê Erdogan digot; ‘Kobanê jî ket, dikeve.’ Bi ser re 10 sal derbas bûn lê Kobanê hêj jî bi serbilindî li ser pêya ye. Niha li Kobanê pergaleke demokratîk a ku mînaka wê tune ye hatiye avakirin. Me ji bo vê bi hezaran şehîd da. Bi hezaran ciwanên me, jinên me canê xwe dan. Kobanê, 10 sal berê îro saet 3 kêm 10 deqeyan hate rizgarkirin û têkoşîna azadiyê ev 10 sal in didome.” 

 

‘BERXWEDAN LI TIŞRÎNÊ DIDOME’

 

Eyşe Efendî, bal kişand ser peyama Rêberê PKK’ê Abdullah Ocalan a di 22’yê Îlona 2014’an de ku digot; “Ketina Kobanê, ketina tevahiya Kurdistanê ye. Bila her kes li gorî vê rastiyê tevbigere.” û wiha got: “Vê bangawaziyê rê li ber rizgariya Kobanê vekir. Her kes bi ruhê seferberiyê berê xwe da Kobanê. Ne tenê Kurdan, enternasyonalên ji çar aliyên cîhanê jî guh dan vê bangê. Ev banga Rêber Apo hêj jî derbasdar e. Divê îro jî her kes li gorî vê bangê tevbigere. Em bi vê zanebûnê têdikoşin. Dîro careke din xwe dubare dike. Li Bendava Tişrînê berxwedana Kobanê dîsa xwe dubare dike. Tişrîn êdî ne tenê bendaveke, ew qada berxwedanê ye. Ev bendav bû bendava şehîdan. Xelk mirinê dide ber xwe û bêyî dudilî diçe bendavê û nobetê digire. Her dirûşma ‘şehîd namirin’ a li wir tê berzkirin, êdî ji dirûşmbûnê derdikeve.” 

 

‘ŞER Û AŞTÎ BI HEV RE NABIN’

 

Eyşe Efendî, bal kişand ser hevdîtinên Şandeya Îmraliyê ya DEM Partiyê yên bi Rêberê PKK’ê Abdullah Ocalan re û axaftina xwe wiha qedand: “Li rexekî bi Rêber Apo re hevdîtinê dikin, li rexa din jî komkujiyan dikin. Siyaseteke durû dimeşînin. Aştî û şer bi hev re nabin. Komkujiyên Enfal, Helebçe, Dêrsim, Newala Qesaba îro li Rojava tên domandin. Dema Erdogan dibêje ‘Bila li Xezeyê zarok nemirin’, li Rojava zarokên Kurdan bombebaran dike. Em bi vê durûtiyê dizanin. Ji bo Xezeyê aştiyê dixwaze lê komkujiyan li Kurdan ferz dike. Em vê qebûl nakin. Em emîrê DAIŞ’ê Erdogan nas dikin. Li dijî vê hewceye her kes berê xwe bide Şoreşa Rojava. Divê Kurd û dostên wa li her derê bibin dengê Rojava. Divê sozên ji bo Kurdan hatine dayin tenê di gotinê de nemînin. Hewceye her kes bi awayekî fiîlî bikeve nava tevgerê. Ji bo aştî û aramiyê divê her kes li dijî êrişên ser Rojava gotina xwe bike û dengê xwe derxîne.” 

 

MA / Emrullah Acar