HATAY - Girtiyê nexweş Siddik Guler ku nikare bimeşe xwest jê re erebeya astengdaran were dayin lê rêveberiya girtîgehê got “dema pêdiviya wî pê dibe bi kar tîne” û ev daxwaz red kir. 

 

Binpêkirinên li dijî girtiyên nexweş her ku diçe girantir dibin. Girtiyê nexweş Siddik Guler ku di lîsteya girtiyên nexweş ên rewşa wan giran a Komeleya Mafên Mirovan (ÎHD) de cih digire, xwest jê re erebeya astengdaran were dayin lê daxwaza wî ji hêla rêveberiya girtîgehê ve hate redkirin. Guler, li Girtîgeha Tîpa T a Îskenderûn a Hatayê tê ragirtin û Lijneya Îdare û Çavdêriyê bi vê hincetê daxwaza Guler red kir: “Li qawîşa hikûmxwar lê tê ragirtin û li girtîgeha me erebeya astengdaran heye û dema pêdivî pê dibe bi kar tîne.” 

 

Nexweşiyên Guler ên weke hîpertansiyon, dil û romatîzmaya gehikan hene. Guler, ji ber sedemên siyasî ji sala 1994’an heta niha girtî ye. Guler, di sala 1994’an de piştî pevçûneke li Amedê hate binçavkirin, di bin çavan de hate îşkencekirin û Dadgeha Ewlekariyê ya Dewletê (DGM) bi îdiaya “bi çeka xwe ya birûxset tev li pevçûnê bûye” cezayê muebbetê lê hate birîn. Guler, di sala 2000'ê de hate tehliyekirin û dadgehê bi hinceta “hesaba xelet a înfazê” dîsa girt. Guler, li gelek girtîgehên Tirkiyeyê ma ye û ji ber îşkenceyê û mercên giran ên girtîgehan, ket rewşekî ku êdî nema dikare bi tena serê xwe bijî. D 29’ê Adara 2022’yan de bêyî daxwaza xwe sewqî Girtîgeha Tîpa R a Menemenê hate kirin. Pêdiviyên wî ji hêla hevalên wî yên qawîşê ve tên pêşwazîkirin û bêyî erebeya astengdaran nikare bijî. Guler, di 12’ê Cotmeha 2024’an de bi îdiaya “tedawiyê qebûl nake” sewqî Girtîgeha Tîpa T a Îskenderûnê hate kirin. 

 

DAXWAZA EREBEYA ASTENGDARAN HATE REDKIRIN 

 

Parêzera Guler, Mehtap Sert di 24’ê Çileyê de bi daxwaza ku erebeya astengdaran bidin miwekîlê wê serîli Serdozgeriya Komarê ya Îskenderûnê da. Dozgeriyê, ji bo nirxandina daxwaza erebeya astengdaran xwest Serokatiya Lijneya Îdare û Çavdêriyê ya Girtîgeha Tîpa T a Îskenderûnê bicive û biryarê bide. Lijne, di 29’ê Çileyê de civiya. Lijneyê got ku Guler bi sedemên siyasî hatiye girtin û got: “Di 12-10-2024’an de piştî tedawiya wî qediyayî ji Girtîgeha Tîpa R a Menemenê hate sewqkirin. Her çende hatibe xwestin ku jê re erebeya astengdaran were dayin jî, hukmên Madeya 12’emîn a Rêziknameya têkildarî Alav û Amûrên Girtîgeh Dikarin li Cem Xwe Bigirin heye. Her wiha li qawîşa hikûmxwar lê dimîne erebeya astengdaran heye û heke hewce bike dikare bi kar bîne. Hikûmxwar li qawîşa A/23’yê tê ragirtin û li odeyê bi 11 kesan re dijî. Bi vê sedemê jî daxwaza bi dîroka 24-01-2025’an hatiye redkirin...” 

 

'DIBE KU EMRÊ WÎ BI TÊRÎ DÎTINA ENCAMÊ NEKE’ 

 

Parêzer Mehtap Sert bal kişand ser rapora Nexweşxaneya Lêkolînê ya Ataturkê ya Îzmîrê ya têkildarî “Kalbûn û nebihîstinê” û got ku tevî raporê jî miwekîlê wê nayê berdan. Mehtap Sert, wiha domand: “Bi zor û zehmet dimeşe lewma malbatê xwest jê re erebeya astengdaran were peydakirin. Lê belê rêveberiya girtîgehê bi hinceta ku di lîsteya kantînê de nîne, ev daxwaz red kir. Piştî hevdîtinên me, midûrê girtîgehê got ku dê nêrîna wezaretê bipirsin û piştre pêvajo were destpêkirin. Di 24’ê Çileyê de me bi nivîskî serî li Serdozgeriya Komarê ya Îskenderûnê da. Di 30’ê Çileyê de jî Lijneya Îdare û Çavdêriyê biryara redkirinê teblîx kir. Mixabin di biryarê de me tu hincet nedîtin. Li rexekî girtiyekî 85 salî yê nexweş ku rapora wî ya ‘kal bûye’ heye, li rexa din jî pêvajoya çareseriyê. Heke armanc aştî be, divê Siddik Guler were berdan. Ji malbata xwe dûr e û daxwaza wî ya erebeya astengdaran tê redkirin. Em ê li dijî biryarê îtîraz bikin. Lê belkî emrê wî bi têrî dîtina encamê neke. Divê êdî girtîgeh dev ji pergala cezakirinê ya cuda ya girtiyên nexweş berdin.” 

 

MA / Hamdullah Yagiz Kesen