ÎZMÎR - Serokê Komeleya 10'ê Cotmehê Îshak Kocabiyik diyar kir ku tevgera kurd bi banga Abdullah Ocalan erka xwe pêk aniye, lê desthilat şerxwaz e û got: "Divê aqilê dewletê polîtîkaya xwe li ser bingeheke aştiyane bimeşîne."
Dema ku PKK'ê li ser banga Rêberê Gelê Kurd Abdullah Ocalan agirbest îlan kir, ji 1'ê Cotmeha 2024'an û vir ve ku pêvajo tê gengeşekirin heta niha dewlet di vê mijarê de gav neavêtiye. Rêxistinên sivîl û nûnerên partiyên siyasî daxwaza gavên pêbawer ji desthilatê dikin.
Serokê Komeleya Aştiyê ya 10'ê Cotmehê Îshak Kocabiyik ku ji aliyê kesên xizmên xwe di êrişa çeteyên DAIŞ'ê ya 10'ê Cotmeha 2015'an de jiyana xwe ji dest dane hatiye avakirin, diyar kir ku ev 6 meh in pêvajoyeke ku navê wê nayê zanîn didome. Kocabiyik anî ziman ku di civakê de her kes bêriya aştiyê dike û geşedanên ji bo aştiyê girîng in û got: "Du aliyên van geşedanan hene. Yek desthilat, dewlet e; ya din jî baskê PKK û Qendîlê ye. PKK’ê agirbest îlan kir û ji aliyê her kesî ve erênî hat nirxandin. Ji niha û pê ve divê gavên pêwîst bên avêtin û bang vala nemîne. Lê bi qasî ku em dibînin, baskê desthilatdariyê xwediyê xebateke wiha nîne. Berovajî vê yekê tişt çêdibin. Li Rojava malbatek ji aliyê SÎHA'yan ve hat qetilkirin. Ez vê yekê wekî sabotekirina pêvajoyê dibînim. Piştre Ekrem Îmamoglû hat girtin û li gelek cihan jiyan felc bû. Ev hemû bi rastî jî nêrîna me xurtir dike ku ev pêvajo dê îsraf bike. Xwezî me di vî warî de fikarên me nebûna, lê em dibînin ku ev fikar hîn zêdetir bûne."
'DIVÊ HEMÛ RÊXISTIN JI BO AŞTIYÊ TEVBIGERIN'
Koçabiyik anî ziman ku muxalefeta civakî xwedî erkên mezin in û diyar kir ku divê civak li ser daxwaza aştiyê bibe yek û vê daxwazê bike civakî.
Kocabiyik bal kişand ser Meclisê û got: "Di vî warî de pêwîst e mirov girîngiyeke mezin bidin CHP'ê. Pêşniyaza CHP'ê ya avakirina komîsyoneke li Meclisê hewldaneke girîng bû. Lê belê divê ev hewldan tenê bi Meclisê re sînordar nemîne. Divê hemû rêxistinên ku pêwîstiya wan bi aştiyê heye, ji bo civakîbûna aştiyê têbikoşin. Her serdem pêşketinên xwe hene. Di pêvajoyê berê d ekêmasî hebûn. Divê mirov dersê ji wan pêvaoyan bigire. Di wê pêvajoyê de meclis ne çalak bû. Partiyên siyasî cih negirtin. Lê niha gelek partiyên siyasî piştgiriya pêvajoyê dikin. Divê Meclis helwesteke şênber bigire. Li Tirkiyeyê 400 hezar girtî û hikumxwar hene. Li girtîgehan cih nema. Desthilateke ku pesnê xwe bi çêkirina girtîgehên nû dide. Divê qanûneke înfazê ya nû têkeve dewrê û girtiyên nexweş dmeildest bên berdan."
DIVÊ GUH BIDIN NEWROZA AMEDÊ
Kocabiyik ku got "Divê hemû civak guh bide dengê Newroza Amedê" wiha dewam kir: "Li gorî min divê dengên aştiyê yên ku ji Amedê derdikevin, bên bersivandin. Bila ev Newroz ji bo hemû gelan aştî û aramiyê bîne. Ji bo ev pêk were divê her kes beşdarî vê pêvajoyê bibe."
Kocabiyik da zanîn ku divê desthilat di vê pêvajoyê de zimanê xwe û helwesta xwe biguherîne û got ku desthilat hê jî vê bûyerê wekî mijara "terorê" dibîne û dixwaze muxalefetê krîmînalîze bike.
Kocabiyik ku got "Divê aqilê dewletê polîtîkaya xwe li ser bingeheke aştiyane bimeşîne" û wiha dawî li axaftina xwe anî: "Nêzîkatiya ku darazê ji holê rabike û bike amûr, ne rewşek e ku em qebûl bikin. Di vê pêvajoyê de divê desthilat pêşî zimanekî ehlê aştiyê bi kar bîne. Lê berevajî vê zimanekî ku şer gur bike heye. Heya ev neguherin wê tişt çênebin. Tevgera kurd tişta ket se rmilê wê kir û li gor banga 27'ê Sibatê tevgeriya."