Qeydên kursên zimanê Kurdî yên serdema nû yên Komeleya Ziman Çand Hunerê ya Ankayê (ANKA-DER) ku li Enqereyê xebatên xwe dike, dest pê kirin. Kurs, dê bi zaravayên Kurdî yên Kurmancî, Kirmanckî û Soranî bên dayin. Qeyd, dê heta meha Cotmehê bidomin. 

 

 

Ji rêveberên komeleyê Dogan Şenses, bal kişand ser girîngiya têkoşîna ziman a di Pêvajoya Civaka Demokratîk û Aştiyê de û got: “Em di serdemeke girîng de ne. Ev pêvajo, du alî ye. Lewma divê mirov ji du aliyan ve bigire dest. Ya yekemîn aştî ye, anku pêvajoya mizakere û peymanê ya bi dewletê re ye. Ya duyemîn jî avakirina civaka demokratîk e. Ev aliyê duyemîn, ji bo me gelek girîng e. Ji ber ku her du gav hevdu temam dikin. Çiqasî pêvajoya avakirinê bidome, çiqasî sazî ava bibin, aştî ewqas dê nêz bibin. Saziyên ziman jî di vê pêvajoyê de xwedî cihekî girîng in. Ked û têkoşîneke ziman heye. Bêstatutiya ziman, bêstatutiya gelekî ye. Bêstatutî jî tunebûnê bi xwe re tîne.” 

 

XEBATÊN BI 3 ZARAVAYAN 

 

Şenses, bal kişand ser qeydên komeleyê yên serdema nû û ev tişt anî ziman: “Xebatên me yên nû dest pê kirin. Atolyeyên havînê hatin temamkirin û niha dema yên payîzê ne. Ji bo polên yekemîn, duyemîn û sêyemîn dê bernameyên me hebin. Dê pola mamostetiyê were vekirin. Di heman demê de dê atolyeyên me yên Kirmanckî û Soranî hebin. Li gel van, yek ji hedefa me ya herî girîng jî ew e ku pêşiya avakirina saziyên nû vekin ku ev sazî weke akademiyan bixebitin. Armanca me ya ji serdema nû ev e.”