AMED - Denîz Guzel ku piştî 33 salan hate tehliyekirin, got: “Ji bo aştî û demokrasiyê divê her kes tişta dikeve ser milê xwe bi cih bîne. Komîsyon jî divê berpirsyartiya xwe bi cih bîne û daxwazan baş fêm bike.”
Denîz Guzel, di 21’ê Tebaxê de ji Girtîgeha Tîpa F a bi Ewlekariya Bilind a Boluyê hate tehliyekirin. Guzel, di sala 1992’yan de li Çewligê hate girtin û tehliyeya wî du caran ji hêla Lijneya Îdare û Çavdêriyê ve bi hincetên “poşman nîne” û cezayên disiplînê hate taloqkirin. Guzel, piştî 33 sal û 4 rojan hate berdan. Guzel, ji ewil çû serdana gora birayê xwe Yavuz Guzel a li Goristana Yenîkoyê ya Rezan a Amedê. Birayê wî, di 30’ê Mijdara 1999’an di çalakiya “Hûn nikarin Roja me tarî bikin” de jiyana xwe ji dest dabû.
BINPÊKIRIN
Guzel, diyar kir ku sepanên li Girtîgeha Boluyê di asta tecrîdê de didomin û got: “Bisînorkirina pirtûkan, lêgerînên keyfî tên kirin. Heval, li ser pirtûkan xebatan dikn. Dema tiştekî nivîskî dîtin, yekser lêgerînê dikin. Dest danin ser pirtûk û nameyên bi Kurdî. Hinceta vê jî weke nebûna memûrên bi Kurdî dizanin. Şert û mercên hevalên cezayê muebbeda girankirî lê hatiye birîn, girantir in. Rewşa girtiyên nexweş xerab e û gelek ji wan bi mirinê re rû bi rû ne. Divê binpêkirinên li girtîgehan bi dawî bibin.”
ÇÛ SERDANA GORA BIRAYÊ XWE
Guzel ku piştî tehliye bû çû serdana gora birayê xwe Yavuz Guzel, ev tişt anî ziman: “Birayê min di sala 1999’an de hate girtin. Cezayê muebbedê lê hate birîn. Di 30’ê Mijdara 1999’an de çalakiya ‘Hûn nikarin Roja me tarî bikin’ li dar xist. Di 6’ê Kanûna 1999’an de şehîd bû. Dema ji girtîgehê derketim çûm serdana gora wî û min xwest berxwedana wî silav bikim. Silav ji wan kesên ev roj ji bo me afirandine. Em ê têkoşîna wî bidomînin. Di nameyeke li pey xwe hiştibû de dibêje; ‘Çi hêjane kesên aştî û demokrasiyê diparêzin, yên guherîn û veguherînê pêk tînin.’ Ev gotin, roja me vedibêjin. Bi guherîn û veguherîna xwe re em ê hesreta xwe ya aştiyê pêk bînin. Em ê vê têkoşînê bi ser bixin. Tu tiştek ji daxwaza aştî û civaka demokratîk hêjatir nîne.”
‘27’Ê SIBATÊ LI GIRTÎGEHÊ BI WATEYA XWE HATE PÊŞWAZÎKIRIN’
Bi domdarî Guzel bal kişand ser pêvajoya Rêberê Gelê Kurd Abdullah Ocalan daye destpêkirin û wiha dirêjî da axaftina xwe: “27’ê Sibatê li girtîgehê bi wateya xwe hate pêşwazîkirin. Pêvajoya fêmkirinê, bi fesixkirinê re derbasî qonaxeke nû bû. Piştî 11’ê Tîrmehê, tevahiya pêvajoyê hate dîtin. Ev pêvajo, Rêbertiyê (Abdullah Ocalan) da destpêkirin. Bandora bangê çêbû. Îradeya pêvajo ferz dike diyar e. Gelê me û girtîgeh zelal in. Ya dikeve ser milê me fêmkirin e. Em ê pêwîstiyên bangê bi cih bînin. Em dikarin bi rast fêmkirin û bi pratîkeke rast vê pêvajoyê birêve bibin. Ev ji bo rayedarên dewletê jî derbasdar e. Divê her kes helwesta xwe nîşan bide. Şêweyekî birêvebirina pêvajoyê heye. Ji bo aştî û demokrasiyê divê her kes tişta dikeve ser milê xwe bike. Divê komîsyon jî tişta dikeve ser milê xwe bike û daxwazan baş fêm bike.”
Guzel, got ku ew dixwaze gelek cihan bibîne û axaftina xwe wiha qedand: “Dixwazim di nav gel de bim. Cihê gel lê ye xweş e. Di rojên xweştir, di rojên aştî pêk hatî de em ê bi hev re bigerin. Em cihekî ku her kes azad lê dijî ava bikin.”
MA / Fethî Balaman