22’yemîn Daîreya Cezayê ya Dadgeha Edlî ya Herêma Enqerê biryarên ceza û beraetkirina 11 rojnamevanên ku di operasyona 25’ê Cotmeha 2022’yan de hatibûn binçavkirin û bi îdiaya "endamtiya rêxistina" bi biryara 4’emîn Dadgeha Cezayê Giran a Enqerê ya 3’yê Tîrmeha 2024’an de hatibûn cezakirin, nirxand.          

 

Daîreya Cezayê ya 22’yemîn a Dadgeha Edliyeya Herêma Enqerêyê di 23’yê Îlonê de ji ber kêmbûna belgeyan dosya li Dadgeha Îstînafê vegerand. Dosyayên kêm careke din ji Dadgeha Îstînafê re hatin şandin.

 

Daîreyê cezayê girtîgehê yê 6 sal û 3 meh li nûçegihanên Ajansa Mezopotamyayê (MA) Dîren Yurtsever, Selman Guzelyuz, Hakan Yalçin, Emrullah Acar û Zemo Aggoz, Midûra Nûçeyan a JINNEWS Oznûr Deger û rojnameger Denîz Nazlîm erê kir. Herwiha daîreyê biryara beraatê ya nûçegihana berê ya JINNEWS'ê Habîbe Eren, nûçegihana MA’yê Ceylan Şahînli û stajyerê berê yê MA'yê Mehmet Gunhan jî bi erê kir. Biryara derheqê nûçegihana MA’yê Bêrîvan Altanê hat betalkirin.

Di biryarê de, hat diyarkirin ku delîlên di dosyayê de hevûdu temam dikin, raya wijdanî ya di pêvajoya dozgeriyê de hatî çêkirin li ser bingeha zabitnameyên danişînê û çavdêriyê ye, hat îdiakirin ku delîl ji aliyê qanûnî ve derbasdar û guncav in, parastin ne pêbawer hatine dîtin û ew li gorî pêkhatin û wesfê sûc hatine pejirandin û bicîh anîn.

 

‘ZINCÎRA DELÎLAN JI ALIYÊ HIQÛQÎ VE TÊR E’     

 

Dadgehê nûçe, weşan, materyalên dîjîtal û nameyên ku li ser rojnamevanan hatine pêşkêşkirin ne wekî tiştên şexsî, lê wekî "zincîrek delîlan a yekparçe" nirxand. Ji ber vê yekê, dadgehê îdia kir ku qebûlkirina her hêmanek wekî "delîlên girêdanek organîk bi rêxistinê re" ji aliyê qanûnî ve têrker e. Herwiha di biryarê de destnîşan kir ku dadgeha herêmî bi nîqaşkirina têkiliya di navbera "şahidiyên şahidan, analîzên materyalên dîjîtal û naveroka weşanan" de gihîştiye encamê û  di vî warî de, di nirxandina delîlan de "xeletiyek eşkere" tune ye.

 

Dadgehê hemû hêman wek hincet hesiband û biryar da ku “di biryardayînê de xeletî tune” û serlêdanên ji bo Îstînafê ji aliyê esasê ve red kir. 

 

Herwiha dadgehê, biryara beraetê ya ji bo Habîbe Eren, Ceylan Şahînlî, Mehmet Gunhan jî erê kir.    

 

DERHEQÊ ROJNAMEVAN BÊRÎVAN ALTANÊ DE BIRYARA ‘BETALKIRINA’ BIRYARÊ     

 

Dadgehê, destnîşan kir ku li ser UYAP’ê dozek li dijî Bêrîvan Altan li Dadgeha Cezayê Giran a 2’yemîn a Mersînê bi heman îdiayê heye û berdewam dike, biryara cezayê Altan betal kir û ji ber wekhevbûna her du dosyayan, biryar da ku "delîl divê bi tevahî werin nirxandin". Ji bo ji nû ve dosya bê nirxandin dosya ji 4’emîn Dadgeha Cezayê Giran a Enqerê re hat şandin.

 

DÊ KONTROLA EDLÎ BIDOME

 

Dadgehê biryar da ku tedbîrên kontrola edlî, bi awayê qedexeya derketina derve li ser rojnamevanên ku cezayên wan hatine erêkirin û ji bo Bêrîvan Altan berdewam bike. 

 

ÇI BÛBÛ?                   

 

Di çarçoveya lêpirsîna ku ji aliyê Enqereyê ve hat kirin de di 29’ê Cotmeha 2022’yan de nûçegihanên Ajansa Mezopotamyayê (MA) Dîren Yurtsever, Bêrîvan Altan, Selman Guzelyuz, Hakan Yalçin, Emrullah Acar, Ceylan Şahînlî, Zemo Aggoz û Denîz Nazlim û nûçegîhanên JINNEW’ê Habîbe Eren û Oznûr Deger û stajyerê berê yê MA’yê di serdegirtinên malan de hatibûn binçavkirin.  Ji bo Zemo Aggoz biryara hebsa malê de hat dayîn, Mehmet Gunhan jî bi kontrola edlî hat berdan. Denîz Nazlîm, Bêrîvan Altan, Selman Guzelyuz, Hakan Yalçin, Emrullah Acar, Ceylan Şahînlî, Habîbe Eren û Oznur Deger jî hatin girtin. Rojnamegerên hatibûn girtin di 16’ê Gulana 2023’an de hatin berdan.

 

MA / Firat Can Arslan